Austria ndihmon të lenduarit në Ferizaj

Shpreh mirënjohjen dhe falënderimin tim të thellë për gatishmërinë dhe reagimin e shpejtë të shtetit të Austrisë, i cili ka ofruar mbështetje për shërimin e dy të lënduarve nga shpërthimi i bombolës së gazit në Ferizaj, të cilët posa të kompletohen procedurat do të nisen për trajtim në këtë shtet.

Si Ministri e Punëve të Jashtme dhe Diasporës bashkë edhe me institucionet tjera, jemi të angazhuar maksimalisht për t’ju dalë në ndihmë qytetarëve të lënduar nga shpërthimi në Ferizaj, duke vendosur kontakte të menjëhershme me vendet mike për të mundësuar trajtimin e të lënduarve jashtë vendit dhe për të bërë të mundur shërimin sa më të shpejtë të tyre.
Falë bashkëpunimit dhe miqësisë sonë të ngushtë me Austrinë dy nga të lënduarit nga ky shpërthim, të cilët kanë nevojë për trajtim jashtë vendit, do ta marrin këtë në institucionet e specializuar shëndetësore austriake.

Falënderoj për angazhimin e tij Ambasadorin e Kosovës në Austri z.Lulzim Pllana dhe stafin e misionit tonë.
Po ashtu, falënderim i veçantë për Ministrin e Punëve të Jashtme të Austrisë, z.Alexander Schallenberg.

Kosova është e bekuar me miqtë e saj, të cilëve do t’u jemi përherë mirënjohës.